Post image for I cucumari (senza coli)

I cucumari (senza coli)

by SioraMafalda on June 19, 2011

in Antipasti,EatIstria Recipes,Siora Mafalda

L'inizio

Ve piasi i cucumari ?

A mi no tanto per magnar, quanto per conservar la mia bellezza rara, peró el mio vecio el xe mato per lori.

Alora, questa ve la devo contar. L’altro giorno iero al mercato e passavo tra le file de vendirigole, e tutte zo a sigar: “Siora, cucumari, la cioghi, freschi del nostro orto, senza e coli”… E mi me penso – Ma cossa ghe ga ciapado la solana a ‘ste povere done, quando mai i cucumari gaveva i coli, miga xe galine, ostia! Intanto, ghe dago un ocio al prezzo: poco piu che niente, cio!

Per no far la figura de ignorante, vado mi a domandarghe alla siora Jole, e ela la me conta come tanti gnocchi (che saria i tedeschi) i se ga velenado con cucumari che gaveva dentro ‘sto batterio che se ciama “Escherichia Coli” (aaaaa, ecco dove iera i coli!), e adesso xe un casin in tutta l’ Europa, nissun no vol comprar piu’ cucumari e verdure varie gnanche se i ghe li tira drio, perche’ i ga paura de ciapar la malattia…
Fasso un poco de ragionamento e me decido de comprar otto chili de cucumari. Perche’, ve domandare? Primo – perche’ i iera a bon prezzo, secondo – perche’ noi no semo ancora in Europa e semo per fortuna ancora indrio con le carte, e terzo – perche’ xe tante robe che ne fa’ vegnir la cagarela (con rispetto parlando) che se gavemo za abituado.

E cussi me go strassinado a casa con ‘sto baul de cucumari, go ciolto la piadina piu grande che gavevo in casa e li go preparadi in questa maniera:
1. Lavarli ben con acqua corrente, taiarghe le punte e spelarli;
2. Taiarli con la macchinetta a fette fine fine, metterli in piadina e salarli;
3. Lassarli in frigo una mezza oretta che i moli l’acqua;
4. Tirarli fora del frigo, strucarli ben e butar via l’acqua che i ga molado;
5. Condirli con panna (“kiselo vrhnje” o, meio, “mileram”) e yogurt,
e missiarghe dentro presemolo tazado fin fin.
La salada
La missiada
Fatto

E fatta la xe – semplice e sai rinfrescante quando fora el sol spaca le piere…

Effetto finale: el mio vecio me ga fatto le feste, el se ga incocconado come un dindio, mi me go stirado le rughe con le scorze, e (quel che xe importante) nissun no correva al gabinetto.

Ecco, fioi mii, ricordeve pero’ de lavar ben la verdura, anche in piu de una acqua, e sare’ sani e bei.

Bona Manjada a tutti!

Related Posts Plugin for WordPress, Blogger...

{ 1 comment… read it below or add one }

olga November 19, 2011 at 17:30

ovaj umak od krastavaca NITI POD RAZNO se ne završava sa prezzemolom iliti peršinom nego jedino i izključivo sa koprcem (dill, aneto puzzolente)…. panna je inače sladko vrhnje, ali nema veze…..

Reply

Leave a Comment

Previous post:

Next post: