Post image for El brand – o la branda?

El brand – o la branda?

by SioraMafalda on July 6, 2011

in Siora Mafalda,Tasty adventures

branding

Brand – ma cossa xe ‘sta roba? – me go domandado giorni fa, quando una carissima signora che la se vanta de esser polexana (la “x” xe intenzionale) la me ga da’ lezion gratuita (in tutti i sensi) de insalate, pomidori, viaggi e dialetto “polexan”.

Dopo tanto zercar, vien fora che “brand ” iera el marchio che ghe se petava a vacche e manzi col segno del proprietario per no missiar el proprio bestiame con quel de altri allevatori. Roba de americani cowboy, cio!
Quando i xe restadi senza praterie, i americani (furbi!) se ga messo a marchiar qualsiasi roba e venderla a caro prezzo anche se iera una monada, come per esempio un pugnetto de carne masinada messo tra due tochi de pan con una foia de insalata e tanta salsa de pomidori schifosamente dolce… no femo nomi, per carita’!

Conclusion della ricerca – go rivado a capir che “brand” xe tutta una storia che generalmente se fa intorno a una monada per venderla cara a certi “pedoci refadi” che no i vedi oltre le apparenze.

E me go messo subito al lavor. Son andada intela botega dove i vendi vetro a metri, me go fatto taiar un per de bei tochi de specio e ghe go messo la cornise. A casa go cusinado una pignata de tripe che spussava tutta la contrada.
El specioP1030942
Quando iera ora de pranzo, el mio vecio se ga trovado davanti tre (3) tochettini de tripe servidi sul specio e spruzadi con un fia de sugo, presemolo e formaggio!

Lui: “Cossa xe ‘sta roba?”
Mi: “Tripe con el brand!”
Lui: “Ma le xe poche e frede!”
Mi: “Appunto, qua se sposa el tradizionale con el moderno, come, no ti capissi?”
Lui: “Mi capisso che qua me toca bater Santa Anna se no vado in cusina a magnar dela pignata…”
Mi: “Ma ti son proprio indrio con le carte, ti sa?”
Lui: “Mi saro’ anche indrio con le carte, e ti stanotte ti dormi in teraza sulla branda, arremengo ti con tutto el tuo brand!”
Bona che no ghe go rivado a dir quanto go speso per i speci in cornise!
la branda
E cussi, distirada sulla branda con i musati che no me dava pase, me xe passada la voia de far monade incartade, almeno in casa.
Un’altra volta, co me capita certe idee, me verzo el ristorante e me fasso pagar 150,00 kune a portata.

Stucco e pittura fa ‘ bella figura, ma xe la sostanza che conta.

Bona Manjada a tutti!

Related Posts Plugin for WordPress, Blogger...

Leave a Comment

Previous post:

Next post: